Tvær undirtegundir grindhvala eru til. Á suðurhveli lifa þeir í köldum sjó allt í kringum Suðurskautslandið. Á norðurhveli er þá að finna í Norður-Atlantshafi, Norðursjó og vesturhluta Miðjarðarhafsins, frá Asoreyjum til Grænlands.

Grindhvalur er með stórt og kúpt enni og langan, sterkbyggðan skrokk sem getur orðið allt að 6,3 metra langur.

Grindhvalir kafa niður á 30-500 m dýpi eftir smokkfiski og fiski á borð við makríl og þorsk en éta þó einnig aðrar tegundir fiska, litla kolkrabba og rækju.

Yfirleitt eru karldýrin mun stærri en kvendýrin og oftast er bakugginn aftursveigður og melónan slútir oft yfir trýnið.

Grindhvalir eru mjög félagslyndar skepnur og hafa sést í hópum sem talið geta allt frá örfáum einstaklingum upp í fleiri en 1.000.