Rákahöfrungurinn er meðal útbreiddustu höfrungategunda á jörðinni en búsvæði hans er sunnan fimmtugustu norðlægrar breiddargráðu. Ísland er því nokkuð norðan við norðurmörk útbreiðslusvæðis hans. Nokkra einstaklinga hefur rekið hér á land en þeir sjást þó sjaldan innan landhelginnar.

Rákahöfrungar eru félagslynd dýr og sjást oft í stórum hópum, jafnvel þúsundir dýra saman. Í Norður-Atlantshafi er þó meðalstærð hópa um 30-40 dýr. Þeir virðast oft halda til í aldursskiptum hópum sem ýmist eru með aðeins ungum dýrum eða fullorðnum dýrum en einnig finnast blandaðir hópar.

Rákahöfrungur getur orðið 2,4 m að lengd og vegið yfir 160 kg. Rákahöfrungur er nokkuð nett höfrungategund og er líkami hans grannvaxinn, straumlínulagaður og sterkbyggður.

Þessi tegund skartar ákaflega fallegu og einkennandi rákamynstri á síðunum þar sem skiptast á hvítir, gráir og blágráir skuggar. Baksvæðið og bakuggi er gráblár en kviðurinn ljós. Trjónan er nokkuð löng og greinilega afmörkuð frá aflíðandi enninu.

Rákahöfrungur er sú eina af fimm tegundum ættkvíslarinnar Stenella sem fundist hefur við Ísland. Rákahöfrunar tjá sig með smellu- og blísturhljóðum auk líkamstjáningar á borð við að stökkva, sveifla sporðinum í loftinu eða stinga höfðinu upp úr sjónum.