Leiftur er útsjávarhöfrungategund sem sjaldan sést innan landgrunnsins. Þótt þessi höfrungur sjáist sjaldan í hvalaskoðunarferðum frá Íslandi er hann nokkuð algengur úti á opnu hafi, utan við strendur Íslands, þar sem dýpið er mikið.

Leiftrar hafa stutt og dökkt trýni, gráar hliðar, dökkt bak og hvítan kvið. Eftir hvorri hlið er löng, hvít rák sem nær frá bakugga aftur á sporð og undir henni er gulleit rák. Leiftrar geta orðið um 2,7 m að lengd og tarfar eru yfirleitt stærri en kýr. Hvert dýr vegur frá 150 til 230 kg.

Eins og aðrir tannhvalir nota þeir bergmálsmiðun við fæðuleit með því að gefa frá sér hátíðnihljóð. Þessi hátíðnihljóð magnast upp þegar þau fara í gegnum líffæri í höfði þeirra sem kallast melóna. Hljóðbylgjurnar endurkastast af hlutum í umhverfinu og leifturinn nemur þær aftur með neðri kjálkanum, þaðan sem þær berast í innra eyrað og hægt er að ákvarða stærð, lögun, staðsetningu og fjarlægð bráðarinnar.

Fæða leiftra samanstendur af fiski á borð við síld, makríl og lýsingi, smokkfisk og rækju. Þeir eiga til að skipta sér niður í smærri hópa og vinna saman við við veiðar. Þessa hópa má stundum sjá ásamt hnúfubökum, marsvínum og langreyðum.

Fengitími leiftra er frá maí fram í ágúst. Meðgangan er 10-12 mánuðir og yfirleitt fæðast kálfarnir, sem eru um 1,3 m að lengd, í júní eða júlí.